தமிழ்
English
Contact
Monday 17th June 2019    
චීන නීතියට එරෙහිව දහස් ගණන් හොංකොං ජනයා විරෝධතාවක! | Lanka Views | Views of the truthLanka Views | Views of the truth

චීන නීතියට එරෙහිව දහස් ගණන් හොංකොං ජනයා විරෝධතාවක!



අපරාධ චෝදනා එල්ල වෙන හොංකොං වැසියන් චීනයට ගෙන යාමට අවසර ලබාදෙමින් උදර්පණ නීති කෙටුම්පතට (Extradition Bill) එරෙහිව පැවැති විරෝධතා පෙළපාලියට 50,000ක ජනකායක් සහභාගි වී ඇත.

අධිකරණයට යොමුකරන චූදිතයන් චීනය වෙත ගෙන යාමට අවසර ලැබෙන නව පනත් කෙටුම්පතෙහි ඉලක්කය හොංකොං දූපතේ දේශපාලන ප්‍රතිවාදීන් මර්දනය කිරීම, එම යෝජිත නීතිය දෝෂ දර්ශනයට ලක් කරන විවේචකයින් පවසයි. හොංකොං ව්‍යාපාරික ප්‍රජාව, නීතිවේදීන්, ශිෂ්‍යයන්, ප්‍රජාතන්ත්‍රවාදය වෙනුවෙන් පෙනී සිටින කණ්ඩායම්. ආගමික සංවිධාන ද ඇතුළු පාර්ශ්ව රැසක්  සුදු ඇඳුමෙන් සැරසී වීදි බැස සටන් පාඨ හඬ නගමින් පෙළපාලියට එක්ව සිටි බව වාර්තා විය.

චීන පාලනයට එරෙහි සියලු කණ්ඩායම්වල එකතුවෙන් 2014 වසරේ දියත් කෙරුණ  විරෝධතා ව්‍යාපාරයට ලක්ෂ සංඛ්‍යාත ජනකායක් සහභාගී වූ අතර සැකකරුවන් භාර දීමේ නව නීතියට එරෙහිව පසුගියදා ආරම්භ වූ විරෝධතා පෙළපාලි සඳහා ජනතාව විශාල වශයෙන් වීදි බසිනු ඇතැයි සංවිධයකයන් බලාපොරොත්තු පළ කරණ ලදී.

හොංකොං දූපත්වාසී දහනව හැවිරිදි තරුණයෙක් පසුගිය වසරේ පෙබරවාරි මාසයේදී සිය විසි හැවිරිදි ගර්භණී පෙම්වතිය සමග තායිවානයේ නිවාඩුවක් ගත කරමින් සිටියදී මරා දැමූ බවට චෝදනා එල්ලවීමත් සමඟ මෙම නීතියේ අවශ්‍යතාව මතු විය. අපරාධය සිදු කළ බවට චෝදනා ලබන සැකකරු රහසින් හොංකොං දූපතට පැමිණීමෙන් පසුව ඔහු තමන්ට භාර දෙනමෙන් තායිවාන් බලධාරීන් ඉල්ලා සිටින නමුත්, එවැනි භාරදීමක් සඳහා තායිවානය සහ තමන් අතර ගිවිසුමක් නොමැති බව හොංකොං බලධාරීන් ප්‍රකාශ කරණ ලදී.

හොංකොං දූපත් චීනයට අයත් ප්‍රදේශයක් ලෙස සැලකුනද එක්සත් රාජධානිය සහ එක්සත් ජනපදය ඇතුළු රටවල් විස්සක් සමග සැකකරුවන් භාරදීමේ ගිවිසුම් අත්සන් කර ඇති නමුත් චීනයේ ප්‍රධාන පාලනය හෝ තායිවානය සමඟ එවැනි ගිවිසුමකින් බැඳී නැත.