தமிழ்
English
Contact
Friday 16th November 2018    
“ජනතාව කෙරෙහි පක්ෂපාතීත්වය පළ කරනු වස් දිවි පුදමි!“ - සැල්වදෝර් අයියන්දේගේ අන්තිම කථාව  | Lanka Views | Views of the truthLanka Views | Views of the truth

“ජනතාව කෙරෙහි පක්ෂපාතීත්වය පළ කරනු වස් දිවි පුදමි!“ – සැල්වදෝර් අයියන්දේගේ අන්තිම කථාව 



එක්සත් ජනපදය විසින් සැප්තැම්බර් 11 නැතහොත් 9/11 වශයෙන් හදුන්වමින් 2001 සැප්තැම්බර් 11 නිව්යෝක් නගරයේ ලෝක වෙළද මධ්‍යස්ථානයට හා පෙන්ටගන් ආරක්ෂක මධ්‍යස්ථානයට එල්ල කළ ත්‍රස්තවාදී ප්‍රහාරය පිළිබද පවත්වන සැමරුම් ලෝකය පුරා අවධානයට ලක් වේ. එහෙත් 9/11 යනු, 2001 වසරට පමණක් අදාළ මතකයක් නොවේ. 1973 වසර සළකා බලන විට චිලී රාජ්‍යයට අදාළ මතකයක් වේ.

1973 සැප්තැම්බර් 11 ඇමරිකා එක්සත් ජනපදය විසින් අනුග්‍රහය දැක්වූ හමුදා කුමන්ත්‍රණයක් මගින් ඊට වසර තුනකට පෙර මහජන ඡන්දෙයන් බලයට ආ චිලී දේශයේ සැල්වදෝර් අයියන්දේගේ සමාජවාදී ආණ්ඩුව පෙරලා දමනු ලැබීය. කුමන්ත්‍රණකාරී හමුදා භට කණ්ඩායම් මාලිගය ආක්‍රමණය කරණ අතර, ජනාධිපති නිල නිවසට ගුවන්යානා පහර දෙද්දී සැල්වදෝර් අයියන්දේ විසින් ගුවන්විදුලියෙන් තම ජනතාව අමතා කළ අවසාන කථාව අපි ඔබගේ අවධානයට ලක් කරමු. තම කතාව අවසානයේ හමුදාවට යටත් වීම හෙතෙම ප්‍රතික්ෂේප කළ ඔහුව හමුදා භාරයට ගෙන මරා දමන ලදී.
(පරිවර්තනය – රමිදු පෙරේරා)
……………………………………………………………………

 

“මිත්‍රවරුනි,

මේ මා ඔබ අමතන අවසාන අවස්ථාවය. ආරංචි වන අන්දමට මේ වනවිට ගුවන් හමුදාව රේඩියෝ පොර්ටාලේස් හා රේඩියෝ කොර්පොරාසියොන් යන ගුවන් විදුලි මධ්‍යස්ථාන කුලුනුවලට බෝම්බ හෙලා තිබේ.
මගේ වචනවල ගැබ් වී තිබෙන්නේ අමිහිරිබවක් නොව අතිමහත් කනගාටුවකි. ස්වකීය ප්‍රතිඥාව පාවා දුන් සියලු දෙනාට, චිලී දේශයේ සොල්දාදුවන්, හමුදාවල ප්‍රධානීන් ලෙස කටයුතු කල යුතුව තිබූ අය – නාවික හමුදාවේ ප්‍රධානී ලෙස තමුන් නම් කරගෙන සිටින අද්මිරාල් මෙරීනෝ, ඊයේ දින පවා ආන්ඩුවට සිය පක්ෂපාතීත්වය සහ භක්තිය ප්‍රකාශ කල මේ වනවිට ජාතික පොලිසියේ ප්‍රධානී බවට තෙමේම පත්වී සිටින ලැජ්ජාසහගත ජෙනරාල් මෙන්ඩෝසා ආදී සියලු දෙනා යම් දිනෙක සදාචාරමය ලෙස විනිශ්චයට සහ දණ්ඩනයට ලක්විය යුතුය.

ජනාධිපති මන්දිරය (ලා මොනෙඩා) වෙත බෝම්බ හෙළීම

මේ සියලු තතු තුල, මා හට අපගේ කම්කරු ජනතාවට කීමට ඇත්තේ එක දෙයකි : මම ඉල්ලා අස් නොවෙමි!

ඓතිහාසික සංක්‍රාන්තික මොහොතක ජනතාව කෙරෙහි වන මාගේ පක්ෂපාතීත්වය පළ කරනු වස් මම දිවි පුදමි. අප විසින් දස දහස් සංඛ්‍යාත චිලී වැසියන්ගේ යහපත් හෘද සාක්ෂිය තුල පැල කරනු ලැබූ බීජයන් සදහටම විනාශ වී නොයනු ඇති බවට මට විශ්වාස බව මා කිව යුතුය. සතුරාට ශක්තිය ඇත. ඔවුන්ට අපව යටත් කරගත හැකි වනු ඇත. එහෙත් සමාජ ක්‍රියාවලීන් අපරාධවලින් හෝ බලහත්කාරය මගින් අත්හිටුවිය නොහැක. ඉතිහාසය අපගේය. ඉතිහාසය නිර්මාණය කරන්නේ ජනතාව විසිනි.

මාගේ දේශයේ කම්කරුවනි, යුක්තිය සදහා වූ ශ්‍රේෂ්ඨ අරගලයේ හුදු සම්ප්‍රේෂකයෙක් පමණක් වූ, ආණ්ඩු ක්‍රම ව්‍යවස්ථාවට හා නීතියට ගරු කරන බවට තමන් දුන් වචනයට සෑම විටම සත්‍යගරුක වූ, එය එසේම ක්‍රියාවෙන් සනාථ කල මිනිසෙක් වෙත ඔබ සෑමකල්හිම දැක්වූ පක්ෂපාතීත්වය සහ විශ්වාසය කෙරෙහි මම කෘතඥ වෙමි. මේ තීරණාත්මක මොහොතේ, මා හට ඔබට ආමන්ත්‍රණය කිරීමට ඉඩ ලැබෙන අවසාන මොහොතේ, අපට ඉගෙන ගැනීමට සිදුවී තිබෙන පාඩමින් නිසි ප්‍රයෝජන ඔබ ගනු ඇතැයි මම සිතමි. දේශීය ප්‍රතිගාමීත්වය සමග සංයෝග වූ විදේශ ප්‍රාග්ධනය සහ අධිරාජ්‍යවාදය විසින් සන්නද්ධ හමුදාවලට ඔවුන්ගේ සම්ප්‍රදාය – ජෙනරාල් ෂ්නයිදර් විසින් ඉගැන්වූ, කොමාන්ඩර් අරායා විසින් සහතික කල ව්‍යවස්ථානුකූල ආණ්ඩුවට පක්ෂපාතී වීම පිලිබද සම්ප්‍රදාය – බිදීමට අවශ්‍ය පසුබිම නිර්මාණය කොට ඇත. ඉහත කී බලවේගවලට අයත් උදවිය මේ වනවිට සිය නිවෙස්වලට වී විදේශ ආධාර සහිතව බලය යලි සියතට ගැනීමට සහ තමන්ගේ ලාභ හා වරප්‍රසාද ආරක්ෂා කරගැනීම දිගටම පවත්වාගෙන යාමට සිහින දකිමින් සිටිති.

මාගේ මේ ආමන්ත්‍රණය අපගේ රටේ චාම් හා සරල ස්ත්‍රීන්ටය, අපගේ සියලු අවධානය සිය දරුවන් කෙරෙහි බව තේරුම්ගෙන සිටි මවුවරුන්ටය, අප ගැන විශ්වාසය තැබූ ගොවියාටය, වඩාත් වැඩියෙන් මහන්සි වී වැඩ කල කම්කරුවාටය. මා අමතන්නේ චිලී දේශයේ වෘත්තීකයින්ටය. ධනවාදය විසින් සුලුතරයකට ලබාදෙන ප්‍රතිලාභ ආරක්ෂා කිරීම සදහා කැපවී ගත්, පංති පක්ෂපාතීත්වය සහිත සිය වෘත්තික සංගම් විසින් අනුබල දෙනු ලැබූ රාජ්‍ය විරෝධයට එරෙහිව පසුගිය කාලය පුරාවට වැඩ කල දේශප්‍රේමී වෘත්තිකයින්ටය.

මේ ආමන්ත්‍රණය ස්වකීය ප්‍රමෝදය සහ අරගලයේ ජීවය අප වෙත පිරිනැමූ තරුණ පරම්පරාවටය. නුදුරේ දී දඩයමට ලක්වීමට නියමිත සියලු දෙනා – චිලී දේශයේ කම්කරුවන්, ගොවීන් හා බුද්ධිමතුන් මම අමතමි. පසුගිය පැය කිහිපය තුල ෆැසිස්ට්වාදය අප රට තුල හිස ඔසවා ඇත. ත්‍රස්තවාදී ප්‍රහාර, පාලම් පුපුරවා හැරීම, රේල් පාරවල් අවහිර කිරීම, තෙල් හා ගෑස්නල විනාශ කිරීම ආදී කඩාකප්පල් ක්‍රියා ඔවුන් සිදුකලේ ඒවා ආරක්ෂා කිරීමේ වගකීම සහිත පිරිස් නිහඩව සිටියදීය. ඔවුහු සිය කඩාකප්පල්කාරී ක්‍රියාවලට කැපවී ගත් අය වූහ. ඉතිහාසය විසින් ඔවුන් විනිශ්චය කරනු ඇත.

නිසැකවම මා ඔබව අමතන මෙම ගුවන් විදුලි මාර්ගය ද නිහඩ කරනු ලැබෙනු ඇත. මගේ හඩ ඔබ වෙත ඉක්බිති තවදුරටත් නොඇසෙනු ඇත. ඉන් කමක් නැත. මගේ හඩ එසේ වූවද ඔබ සමග වනු ඇත. මම සෑමවිටම ඔබ පසෙකින් සිටිමි. අඩු වසයෙන් ආත්ම ගරුත්වය පාවා නොදුන් සහ කම්කරුවන් වෙත පක්ෂපාතී වී සිටි මිනිසෙක් ලෙස මා ගැන මතකය ඔබ අතර පවතිනු ඇත.

ජනතාව තමන්ව ආරක්ෂා කරගත යුතුය. එහෙත් ඔවුන් බිලි විය යුතු නැත. වෙඩි උන්ඩ මගින් තමුන්ව විනාශ කිරීමට ඔවුන් ඉඩ නොදිය යුතු සේම තමුන්ව අවමානයට පාත්‍ර කිරීමට ද ජනතාව ඉඩ නොතැබිය යුතුය.

මගේ රටේ කම්කරුවනි, චිලී දේශය ගැන හා එහි ඉරණම ගැන මම විශ්වාස කරමි. ද්‍රෝහීත්වය රජයන මෙම අන්ධකාර සහ අප්‍රසන්න මොහොත වෙනත් මිනිසුන් විසින් ජයගනු ඇත. ඒ විශ්වාසය සහිතව පෙරමුණට යන්න. එකල්හි වඩා යහපත් සමාජයක් නිර්මාණය කිරීම සදහා නිදහස් මිනිසුන්ට නිදහසේ පිය නැගිය හැකි ශ්‍රේෂ්ඨ මාවත් වැඩි කල් නොගොස් යලිත් වරක් විවර වෙනු නොඅනුමානයි.

චිලී දේශය දිනේවා! ජනතාව දිනේවා! කම්කරුවන් දිනේවා!

මේ මාගේ අවසාන වචනය. මාගේ පරිත්‍යාගය අපතේ නොයනු ඇතැයි මට විශ්වාසය. අඩුම තරමින් සාපරාධීත්වය, බියගුලුකම සහ ද්‍රෝහීත්වය දඩුවමට ලක්කරන සදාචාරමය පාඩමක් බවට එම පරිත්‍යාගය පත්වනු ඇතැයි මට විශ්වාසය.“

ජනාධිපති අයියන්දේ ප්‍රහාරකයන්ට මුහුණ දීමට සූදානම් වෙමින්




Related News