தமிழ்
English
Contact
Friday 16th November 2018    
මට පක්ෂයක් නෑ, දුප්පතාට උදව් කරන අයට මම සපෝට්! - මුත්තයියා මුරලිදරන් | Lanka Views | Views of the truthLanka Views | Views of the truth

මට පක්ෂයක් නෑ, දුප්පතාට උදව් කරන අයට මම සපෝට්! – මුත්තයියා මුරලිදරන්



ජනප්‍රිය ක්‍රිකට් ක්‍රීඩක ‘මුත්තයියා මුරලිදරන්‘ පසුගියදා BBC පුවත්සේවය සමග කළ සම්මුඛ සාකච්ඡාවක් සමාජ අවධානයට ලක් විය. මාධ්‍යවේදියා ක්‍රිකට් ක්‍රීඩාව සම්බන්ධයෙන් ප්‍රශ්න කරමින් සංවාදය ආරම්භ කරයි. එහෙත්, ජනතාවගේ ඇත්ත ප්‍රශ්න සහ දේශපාලනය විසින් ඒවා පාවිච්චි කරන ආකාරය සම්බන්ධව ඔහු කළ අදහස් දැක්වීම එහි වඩාත් සංවේදී පැත්ත බව බොහෝ දෙනා අදහස් පළ කර තිබිණි. කෙසේවෙතත් මුරලිදරන් කළ අදහස් දැක්වීම අප මෙහි පළ කිරීමට තෝරාගත්තේ ඔහු දේශපාලනයට එන බවට බොහෝ ප්‍රචාර යද්දී එය එසේ නොවන බවට මුරලිදරන්ම ප්‍රකාශ කළ බවද සිහිපත් කරමිනි. ක්‍රිකට් කරුවක්  පැමිණියද සිනමා තරුවක් දේශපාලනයට පැමිණියද සිදුවන්නේ පවතින දේශපාලනයට පාවිච්චිවීම බව නිගමනය කළ හැක්කේ අපගේ අතීත අත්දැකීම් ඇසුරිනි.කෙසේවුවද  මුරලිදරන් විසින් සිදු කරන අදහස් දැක්වීමෙන්ද නියෝජනය වන්නේ ඔහුගේ දේශපාලනය බව අපගේ අදහසයි. ලංකාවේ දේශපාලන අර්බුදය සම්බන්ධයෙන් මුරලි ප්‍රකාශ කළ කොටස පමණක් මෙහි පළ කෙරෙන බව කරුණාවෙන් සළකන්න.

————————————————————————————————–

BBC මාධ්‍යවේදියා – ක්‍රිකට් ක්‍රීඩාවෙත් අර්බුද, දේශපාලනයෙත් අර්බුද, ඔක්කොම අර්බුද නේද ලංකාවෙ?

මෙහෙමනේ අර්බුදයක් නැති රටක් නෑ. අපි හිතනවා අපේ රට තමයි අර්බුද කියලා. ඇත්ත කතාව, මං බිස්නස් කරනවානෙ. කොරියාවෙන් කට්ටියක් එන්න හිටියා මගේ ෆැක්ටරියට. ඒ අය කිව්වා ඔයගොල්ලංගෙ රටේ මාර අර්බුද නේද කියලා. මම කිව්වා, මේ ඉන්ටනැෂනල් මීඩියා කියන එකනෙ. ඔයගොල්ලා එන්න මං එයාපෝට් එකට වාහනයක් එවන්නම්, හොටෙල් එකට යන්න ඉතිරි ටික බලාගන්නං කියලා. මගෙ වචනෙ උඩ ආවා, මොනවත් වුණෙ නෑ. දැන් තියෙන අර්බුදය ගැන ගත්තොත් මම නම් හිතන්නෙ නීතියෙන්, මොනව හරි ප්‍රශ්නයක් නම් ඕක නීතියෙන් බේරගන්න. ශ්‍රේෂ්ඨාධිකරණයෙන් බේරාගන්න. මේකට අහිංසක මිනිස්සුන්ව අදින්න එපා. මේ රටේ 60%ක් විතර ඉන්නේ දවසේ පඩියට වැඩ කරන අය. මොනවහරි උන ගමන් එයාලට කන්න නෑ. මේ ලංකාවේ 70%ක් විතර ඉන්නේ දුප්පත් මිනිස්සු. ඒගොල්ලන්ගෙ පඩිය ගත්තොත් රුපියල් 25000ක් විතර. ඉතින් ඒ ගම්වල ඉන්න මිනිස්සු බොහොම අමාරුවෙන් තුන්වේලක් කාලා ළමයි ඉස්කෝලේ යවන්නේ.

මං ඕකට කතාවක් කියන්නම්. ඔය දෙමළ ඇමතිවරු කතා කරනවා අයිතිය, ඉස්සර වෙච්ච දේවල් ගැන, ප්‍රජාතන්ත්‍රවාදය, මට තේරෙන්නෙ නෑ මොනවද කියලා. මං ඔය දේශපාලනය දන්නේ නෑ. ඇත්තටම කිලිනොච්චියේ වෙච්ච දෙයක් මේක සති දෙකකට කලින්. අවුරුදු 9 ක කෙල්ලක් සියදිවි නසාගත්තා. හේතුව මොකද දන්නවද. නිළ ඇඳුම් ප්‍රශ්නේ. ඒ පවුලේ ළමයි 3 දෙනෙක් ඉන්නවා. එක්කෙනෙක්ට 12යි 9යි 7යි. තාත්තගේ දවසේ පඩිය 200යි. අම්මා තමයි බලාගන්නේ. බොහොම අමාරුවෙන් එක වේලක් කන්නේ. ඉස්කෝලෙට යවනවා තුන්දෙනාවම. ඒ ඇඳුම් සවුත්තු වෙලා හරි මොකක් හරි වෙලා දෙතුන් පාරක් ටීචර් කිවුවා අලුත් එකක් ගන්න. දැන් කූපන් එකක්නේ දෙන්නේ. අරගෙන මහගන්න ඕන. ඉතින් රෙදි ගත්තට පස්සෙ මහගන්න රුපියල් 200ක් 250ක් යනවලු, සල්ලි නෑ. බැලුවා බැලුවා මේ ළමයා සියදිවි නසාගත්තා. ඒක බලන්න එක්කෙනෙක්වත් එක ඇමතියෙක්වත් නෑ. කවුරුත් දන්නෙත් නෑ. අපේ තියෙනවා හැම දිස්ත්‍රික්කයෙන්ම දුප්පත් මිනිස්සුන්ට උදවු කරන්න පදනමක්. එයාලට මේක ආරංචි වෙලා ගිහිල්ලා. මං මේ අයට දුන්නට කියනවා නෙමේ, මං රු. 25,000ක් දුන්නා. අනිත් ළමයි දෙන්න වෙනුවෙන් හැම මාසෙම රුපියල් 1,000 ගානේ හැම මාසෙම දෙනවා. අඩුම ගානේ මේ වගේ තව එක දෙයක් වත් සිද්ධ නොවෙන්න. එක මන්ත්‍රී කෙනෙක් නෑ. ඒ අම්මා අඬනවලු.

අපි ගමුකෝ. ඔයාට ළමයි දෙන්නෙක් ඉන්නවා. ඔයාගේ ප්‍රධානම එක මොකක්ද? ඒ ළමයින්ට තුන් වේලක් කන්න දෙන්න. ඊට පස්සෙ ඉගැන්වීම. ඒ දෙකනේ මූලික. ඇඳුමක් ගන්න හෝ තව දේවල් ගන්න හෝ ඒවා අනික් දේවල් මේ රටේ 70% මිනිස්සු ජීවත් වෙන්නේ එහෙම. හරි අමාරුවෙන්. කොළඹ මිනිස්සුන්ට පරිප්පු වලින් රුපියල් 5ක් පෙට්‍රල් වලින් 10ක් ගියාට, කොළඹ ඉන්න ලක්ෂයකට වඩා පඩි ගන්න අය. ඒ මිනිස්සුන්ට මේ වෙනස තේරෙන්නේ නෑ. ඒ නිසා මේ රටේ ඉස්සෙල්ලම බලන්න ඕන ඕක. ප්‍රජාතන්ත්‍රවාදය, නීතිය වගේ දේවල් දෙවනුවයි. මේ රටේ මිනිස්සු මට බනී. නීතිය, ප්‍රජාතන්ත්‍රවාදය මිනිස්සු තම තමන්ට ඕන විදියට හරවා ගන්නවා. දක්ෂ ලෝයර්ස්ලා ඉන්නවා. ඔයා වරදක් කළත් ඒක නිවැරදි කරන්න පුලුවන්. සිදුරු තියෙනවා. සල්ලි තියෙනවා නම් ඕන දෙයක් කරගන්න පුලුවන් මේ රටේ.

BBC මාධ්‍යවේදියා -ඒ කියන්නේ මුරලි කියන්නේ ඒවට මූලිකත්වය දෙන්නේ නැතුව මිනිස්සුන්ගේ එදිනෙදා ප්‍රශ්න විසඳන්න ඕන කියලා මූලිකවම?

ඉතිං ඒකටනේ පාර්ලිමේන්තුවට නියෝජිතයන්ව යවන්නේ මිනිස්සු ඒ පළාත්වල ඉඳන්. එයාලා කියන්නෙ නෑනෙ මට ප්‍රජාතන්ත්‍රවාදය දෙන්න කියලා. කෝ මේසෙ කෑම තුන් වේලක්? ඉස්කෝලෙට යන ළමයට ඉගෙනීමක්? බුද්ධිය දෙන්න, ඒවනෙ වැදගත් දේවල්.

BBC මාධ්‍යවේදියා – ගොඩක් වෙලාවට උතුරේ දේශපාලකයන්ගෙන් ඇහුවොත් කියන්නේ උතුරට දේශපාලන විසඳුමක් ඕන.

මොනවද. මං අහන්නේ ඔයාගෙන් මොනවද උතුරට කියලා දේශපාලන විසඳුමක් ඔයාට දෙන්න පුලුවන් කියලා කියන්න බලන්න. මම කියන්නම්. මම දෙමළ, ඔයා මුස්ලිම්නේ. හැම ජාතියකම මිනිස්සු ඉන්නවා. අපි ඔක්කොම මිනිස්සු. මගෙන් කෑල්ලක් කැපුවත් ලේ යන්නේ ඔයාලගෙන් කෑල්ලක් කැපුවත් ලේ යන්නේ. හරිද, මේවා මේ ඉතිහාසේ ඉඳන් මිනිස්සු හදාගත්තු දේවල්. මම ඇත්ත කතා කළොත්, 1977 දී අපේ ගෙවල් ඔක්කොම පිච්චුවා. අපේ තාත්තගේ තාම තියෙනවා කඩුවෙන් ගහලා 18ක් මැහුම් දාපු එක. බොහොම අමාරුවෙන් තමයි බේරුනේ. ඒත් අපේ තාත්තා රට දාලා ගියේ නෑ. නෑදෑයෝ ඔක්කොම ගියා රට දාලා ඔක්කොම ඉන්දියාවේ ඉන්නේ. ඒත් අපි ගියෙ නෑ. 1983 අපිට මොනවත් උනේ නෑ. අපි විස්වාස කරනවා අපි මේ රටේ පුරවැසියෝ. ඇත්ත, අපේ සීයලා ආවේ ඉන්දියාවෙන්. ඒ වුනාට අපි දැන් ලංකාවේ පුරවැසියෝ.

ජාතීන් වශයෙන් ගත්තොත් වැරදි දේවල් උනා දෙපැත්තෙන්ම. මං කියන්නේ නෑ සිංහල මිනිස්සු වැරදී කියලා ඔක්කොම. 5% ක් හිටියා දේශපාලන ගේම්වලදී අයුතු ප්‍රයෝජන අරන් තමයි මේවා කළේ. මුළු රටම විනාශ වුනා. ඒ වගේමයි ඒ දේශපාලනයෙන්ම ප්‍රභාකරන් එයාට ස්ථාවරයක්. එයා පටන් ගත්තා දෙමළ මිනිස්සු වෙනුවෙන් පෙනී ඉන්න. මුල් කාලේ කළා. ඒත් ඊට පස්සේ එයත් පටන් ගත්තා මිනී මරන්න. ඒ පැත්තෙ වගේම මේ පැත්තට බෝම්මබ දැම්මනෙ. ඒ විදියට දෙපැත්තෙම මිනිස්සු මැරුනා. දැන් මේ යුද්ධයක් ඉවර කරලා තියෙන්නේ. යුද්ධයකදි සාමාන්‍ය මිනිස්සු මැරෙනවා, ඒකයි යුද්ධයක් කියන්නෙ. එහෙම බැරිනම් සාමකාමිව බේරාගන්න ඕන. ඉතින් 2009න් පස්සේ එයාලා ඉල්ලනවා නම් අපේ ප්‍රජා අයිතිය නෑ, මේක නෑ අරක නෑ කියලා ඒක අසාධාරණයි. අපිත් සාධාරණ වෙන්න එපැයි. මේ රටේ 80ක්% විතර ඉන්නේ සිංහල බෞද්ධයෝ. ඒගොල්ලන්ට අයිතියි මේ රට. කොච්චර නෑ කිවුවත්. ආගම් වලින් බැලුවොත් අපි සුලු ජාතිකයෝ.

මං දැන් මේ ප්‍රශ්නවලදි බලන්නෙ, ඉස්කෝලේ ගියානෙ. දක්ෂතාවය තිබුන නිසා මං ආවා. මගේ දක්ෂතාවලදී සිංහල, දෙමළ, මුස්ලිම්, බර්ගර් කියලා බලලද මට සපෝට් කළේ? ඒක තමයි වෙන්න ඕන. බොරුවට මේ මෙයාලා මේ දේශපාලකයෝ ඇවිල්ලා අපි පෙනී සිටිනවා කිවුවට සාමාන්‍ය මිනිහා ගැන බලලා නෑ. මම නම් කියන්නේ නෑ මේ රටේ හිටපු ජනාධිපතිවරු දෙන්නෙක් විතරයි දුප්පත් මිනිහා ගැන බැලුවේ. ඔයාලම හිතාගන්න කවුද කියලා. නැත්තම් කියයි මම එයාලට දේශපාලනිකව සපෝට් කියලා. මම කාටවත් සපෝට් නෑ, මම සපෝට් කරන්නේ දුප්පතාට උදව් කරලා එයලව ගොඩගන්න අයට විතරයි. මට පක්ෂයක් නෑ. දුප්පතාට උදව් කරන්නේ කවුද මම එයාලට සපෝට්.
මට මේ රටේ මිනිස්සු උදවු කරලා තියෙනවා. මාව ගොඩ දාලා තියෙනවා. අපිත් පුලුවන් විදියට ඒක කරන්න ඕන. ඒකයි මං පදනමක් කියලා එකක් හැදුවේ දැන් අවුරුදු 18ක් වෙනවා මං මේක හැදුවේ 2000 දී. මායි රණසිංහයි හදලා දැන් දිස්ත්‍රික්ක 12 ක තියෙනවා. අපේ වියදම මිලියන 200ක්. මගේ සල්ලිත් දානවා පිටරටින් ගේනවා..මොනවා හරි කරනවා. අපිට මිලියන 200ක් එකතු කරලා මිනිස්සුන්ට උදව් කරන්න පුලුවන් නම් අපි පාර්ලිමේන්තුවට යවන අයට බැරි ඇයි? ඒගොල්ලන්ට කියන්න බෑ අපි මේ ණය ගත්තු නිසා කියලා. තාත්තා කෙනෙක් ගෙදරක් පාලනේ කරන්නේ කොහොමද. බලනවා කොහොමද කරන්නේ කියලා. ණය අරන් හරි කරනවා. ණය ගෙවන විදියක් බලනවා. වැඩිපුර වැඩ කරනවා. පාර්ලිමේන්තුවට මිනිස්සු යවන්නේ රට පාලනය කරලා මිනිස්සුන්ට යහපතක් කරන්නනේ.ෙ ඉතිං බඩු මිල වැඩි වෙද්දී අරක නිසා බෑ මේක නිසා බෑ කියලා කියන්න බෑ. මොකද දුන්නේ වැඩක් කරන්න. ඒක බෑ කියනවා නම් දාලා යන්න ඕන. නිදහසට කරුණු කියන්න බෑ. මට බෝල් කරන්න බැරි නම් මට නිදහසට කරුණු 25000ක් විතර කියන්න පුලුවන්. මේක උනා මට මේක නිසා ඒක බෑ ඒක නිසා මේක බැරිඋනා කියලා. නටන්න බැරි මිනිහට පොළව ඇදයි වගේ කතාවක් ඒක.

අපි අමාරු කාලෙක ජීවත් වුනේ. 1977 , 1983 සහ ජේවීපී ප්‍රශ්න කාලේ බයෙන් ජීවත් වුනේ. මේ ගේ හැදුවේ 1997. මම ක්‍රිකට් ප්‍රැක්ටිස් ගියේ අතුරු පාරවල් වලින්. බයයි පාර්ලිමේන්තු පාරෙන් යන්න කොයි වෙලේ බෝම්බයක් දායිද අපිත් අහුවෙයිද කියලා. එහෙමයි ජීවත් වුනේ දෙමළ වෙලත්. දැන් යුද්ධේ ඉවර වුනාට පස්සේ නිදහසේ යන්න පුලුවන්. ඒකනේ නිදහස. ඒ නිදහස හැමතැනම තියෙනවනේ අද යාපනේ යන්න පුලුවන්නේ. මම යුද්ධ කාලෙත් යාපනේ ගියා. එක්සත් ආතීන්ගේ සංවිධානයත් එක්ක වැඩ කරද්දී ජපානෙන් දීපු ආහාර බෙදලා දෙන්න ගිහින්තමිල් චෙල්වම් වත් හම්බෙල තියෙනවා. දැන් ඕවා මුකුත් නෑනේ දැන් දුප්පත් මිනිහා ගැන බලන්න පුලුවන්නේ.

BBC මාධ්‍යවේදියා තාම යුද්දෙන් අතුරුදන් වෙච්ච අයගේ මව්පියෝ හොයනවා එයාලව..මේ ප්‍රශ්න වලට විසඳුමක් දෙන්න ඔන නේද මුරලි?

මට කියන්න කොහොමද විසඳුමක් දෙන්නේ..කියන්න විසඳුම කොහෙන්ද ගන්න පුලුවන්..හිතමු ශෙල් එකක් ගහනවා ආමි එකෙන්..මැරෙනවා..කියන්න පුලුවන්ද මෙයාව තමයි මැරුවේ කියලා..එල්ටීටී..ඊ එකෙන් ගහනවා බෝම්බ දානවා..පැහැරගෙන ගියා කියනවා..උත්තර නෑ..යුද්ධයක් කියන්නේ ඕක..උත්තරයක් හොයන්න බැරි දේවල් ගැන කතා කරලා වැඩක් නෑ..අතීතය ගිහින් ඉවරයි..එහෙම වෙලා තියෙනවා නම් ඒ පවුල් වලට ජීවන උපක්‍රමයක් හදලා දීලා වන්දියක් දීලා ඒවා කරන්න ඕන..එයාලට විතරක් නෙමේ ආමි එකේ අයටත්..යාපනේ විතරක් නෙමේ මෙහේ බෝම්බ වලින් මැරිච්ච මිනිස්සු කොච්චර ඉන්නවද..දෙනව නම් ඒගොල්ලන්ටත් වන්දි ගෙවන්න..කරනව නම් හැමෝටම සමානව කරන්න ..දැන් තියෙන ලොකුම ප්‍රශ්නේ තමයි මේ රටේ ආර්ථිකේ හදලා දුගී දුප්පත් මිනිහව උඩට ගන්න එක..එකිනෙකාට එක එක මත තියෙනවා..මේක අනුගමනය කරන්න කියලා මං කියන්නේ නෑ මේක මගේ මතය විතරයි..
ඉස්සෙල්ලම බලන්න ඕන දුප්පත්කම නැතිකරන්න..ලමයෙක්ට බඩගින්නේ ඉන්නැතුව තුන් වේලක් දෙන්න ඕන..පාර්ලිමේන්තුවට යවන මන්ත්‍රීවරුන්ගේ යුතුකමක් ඒක.

BBC මාධ්‍යවේදියා – ගොඩක් අය කියනවා හොඳය අයව දේශපාලනේට තොරගන්න ඕන කියලා.

කොහොමද හොඳ අයව ‍තෝරගන්නේ. සමහර වෙලාවට කියන ඒවා බොරු වෙන්නත් පුලුව්න්නේ. අරයා කමිශන් ගැහුවා මෙයා මෙහෙම කළා. ඒවා ඔප්පු කරන්න ඕන. කවුරු උනත් කොයි පක්ශේ උනත් කවුරුහරි චෝදනාවක් කරනවා නම් නීතිය ඉස්සරහා ඔප්පු කරන්න. දැන් ඔය තරඟ පාවාදීම් ගැන කතා කරනවනේ. ඕවා ඔප්පු කරන්න ඕන. ඒක ඒගොල්ලන්ට කරන අපරාධයක්. ඒ මිනිහට පාරෙ බැහැලා යන්න බෑ. සනත් ජයසූරිය ලෝක පූජිත ක්‍රීඩකයෙක්. මාත් එක්ක ක්‍රිකට් ගහන්නේ පොඩි කාලේ ඉඳන්. මගේ යාලුවා නිසා කියනවා නෙමේ. චෝදනා ඔප්පු කරනකම් එයා වරදකාරයෙක් නෙමේ. ඒත් පාරේ බැහැලා යන්න බැරි තැනට මිනිස්සු කතා කියනවා. දේශපාලකයන්ටත් සමහරුන්ට ඔහොමයි. බොරු කියල හරි මිනිහව සවුත්තු කරනවා. මම කියන්නේ ඕවා ඔක්කොම පැත්තකට දාන්න.
සාමාන්යෙන් මිනිහෙක් උනාම ජීවත් වෙන්න ක්‍රමයක්නේ ඕන. ඔයා තාත්තා කෙනෙක්. ළමයි ඉන්නවා. ළමයා බඩගින්නේ අඬද්දීදී කන්න දෙන්න බැරි නම් ඔයාට කොච්චර රිදෙනවද? අපිට සල්ලි තියෙනවා මේවා නිසා. ඒත් දුප්පත් මනුස්සයට? මම කියන්නේ දේශපාලකයෝ ඒ තත්වේ බලන්න. ඉස්සෙල්ලම ඒක නිවන්න. අධ්‍යාපනය දෙවනුව. සෞඛ්‍යය තුන්වෙනුව. අනෙක්වා ඊට පස්සේ. තාත්තා කෙනෙක් පවුල බලාගන්නවා වගේ මේ රටේ ඔක්කොම ළමයි කියලා හිතලා දේශපාලකයා වැඩ කරන්න ඕන. බැරි නම් දාලා යන්න ඕන. මං ක්‍රිකට් බෝඩ් එකට කිවුවෙත් ඕක. කරන්න බැරි නම් දාල යන්න තව කෙනෙක්ට කරන්න අවස්ථාව දෙන්න.

මං ඔයාට කියන්නද කතාවක්. මාව ආසියා කුසලාන 2010 දී හොඳට බෝල් කර කර ඉද්දිත් මාව ඉවත් කළා වෙන කාරණාවක් කියලා. හැබැයි ආයේ මාව මැච් එකට ගත්තා. ඒකෙන් පස්සේ තමයි මං විශ්‍රාම යන්න තීරණේ කළේ. මාව විශ්වාස නැතිනම් වෙන මං වෙනුවට කෙනෙක් ඉන්නවා නම් මං ඉඳලා වැඩක් නෑ. ඒ වගේ දීලා යන්න ඕන. මිනිස්සු මට බනී. ඔයා හිතනවද ඔය ‍රැස්වීම් වලට මිනිස්සු එන්නේ මං දන්න විදියට එක්කෝ කන්න දීලි දීලා බස් එකෙන් ගෙනල්ලා බස්සන මිනිස්සු තමයි වැඩිපුර ඉන්නේ. ඒක ඉතින් එයාලගේ අයිතිය. එදා වේල හොයාගන්න මිනිස්සු කොළඹට ඇවිල්ලා කෑ ගගහා ඉදීද? මං දන්නේ නෑ මිනිස්සු පිළිගනීද කියලා.