தமிழ்
English
Contact
Wednesday 21st August 2019    
බෞද්ධ කාන්තාවන්ට වද සැත්කම් කළ පුවත විශ්වාස කළ නොහැකිය - වෛද්‍යවරු පවසති | Lanka Views | Views of the truthLanka Views | Views of the truth

බෞද්ධ කාන්තාවන්ට වද සැත්කම් කළ පුවත විශ්වාස කළ නොහැකිය – වෛද්‍යවරු පවසති



අන්තවාදී සබදතා ඇති වෛද්‍යවරයෙක් සිංහල බෞද්ධ කාන්තාවන් 4000ගේ වද සැත්කම් සිදුකළ බවට පළ වූ පුවත විශ්වාස කළ නොහැකි බව වෛද්‍යවරු පවසති.
පසුගිය වැනිදා දිනපතා දිවයින පුවත්පත ඇතුලු ඇතැම් මාධ්‍ය හරහා ප්‍රචාරය කළ මෙම පුවතට අනුව කුරුණෑගල ශික්ෂණ රෝහලේ සේවය කර ඇති නම් වෛද්‍යවරයකු සිය හිතවතුන්ට පවසා ඇත්තේ තමන් විසින් සිංහල බෞද්ධ කාන්තාවන් සිසේරියන් සැත්කම්වලට භාජනය කරන අවස්ථාවන්හි ඔවුන්ට යලි දරුවන් නූපදින සේ වද සැත්කම් සිදුකළ බවය. කෙසේවෙතත් මෙම පුවත පිළිබද අදහස් දක්වා ඇති වෛද්‍යවරු ගනනාවක් එය හාස්‍යෙයන් යුතුව ප්‍රතික්ෂේප කරමින් පවසා ඇත්තේ මෙය ව්‍යාජ පුවගක් බව වටහා ගන්නට නාරිවේද විශේෂඥ වෛද්‍යවරයකු වන්නට අවශ්‍ය නැති බවය. සාමාන්‍යයනේ සිසෙරියන් සැත්කමක් යනු වෛද්‍යවරයකුට හිතුමතයේ තනිවම සිදුකළ හැකි සැත්කමක් නොවන බවද අවම වශයෙන් සහායක වෛදයවරු, නිර්වින්දනවේදින් සහ හෙද කාර්යමණ්ඩලය වැනි කාර්යමණ්ඩලයේ 10 දෙනකු මෙවැනි සැත්කමකට සක්‍රියව සහභාගිවන බවද ඔවුන් අතරින් කිසිවකු නොදැන සිසේරියන් සැත්කමක් සිදුකළ නොහැකි බවද ඔවුහු පෙන්වා දෙති. මේ සම්බන්ධයෙන් විවිධ මාධ්‍ය හරහා අදහස් දක්වා ඇති ප්‍රසව හා නාරිවේද වෛද්‍යවරු ප්‍රකාශ කරන්නේද මාධය හරහා පළ කළ වද සැත්කම් 4000ක් සිදුකිරීම වැනි රහස් අපරාධයක් තනි වෛද්‍යවරයකුට කිසිසේත්ම සිදුකළ නොහැකි බවය.
‘විකල්ප‘ වෙබ් අඩවියට මෙම පුවත සම්බන්ධව සිය අදහස් පළ කරමින් ලිපියක් සපයන වෛද්‍ය පියල් පෙරේරා මෙම පුවතේ ඇති අසත්‍යතාව කරුනු සහිතව සනාථ කරයි. කොළඹ වෛද්‍ය පීඨයෙහි අධ්‍යාපනය හදාරා, ප්‍රසව සහ නාරීවේදී ජේෂ්ඨ වෛද්‍යවරයෙක් ලෙස වසර 14ක් ශ්‍රී ලාංකාවේ සේවය කර ඇති ඔහු, දැනට බ්‍රිතාන්‍යයේ මිල්ටන් කේන්ස් විශ්වවිද්‍යාල රෝහලෙහි සේවය කරයි
වසර 22ක් ප්එ‍රසව හා නාරිවේද වෛද්‍යවරයකු ලෙස කළ රැකියාවේ අත්දැකීම් අනුව සහ බොහෝ දෙනකුගේ ඉල්ලීම මත කෙටි පැහැදිලි කිරීම් කිහිපයක් ඉදිරිපත් කිරීමට ඔහු කටයුතුකර ඇත. විකල්ප වෙබ් අඩවියේ ඔහු විස්තර කරන ආකාරයට සිසේරියන් සැත්කම් දස දහසකට වඩා සිදුකර ඇති වෛද්‍යවරුන් සිය ගණනකි. වඳ සැත්කම් දසදහසකට වඩා සිදුකර ඇති වෛද්‍යවරුන් අතලොස්සක් ඇත. නමුත් සිසේරියන්, වඳ සැත්කම් හාරදහසක් සිදු කිරීමට එක් වෛද්‍යවරයෙකුට ලැබෙන ඉඩකඩ ඉතාම අල්පය. සියල්ලටම රහසේ එතරම් ප්‍රමාණයක් සිදුකිරීම ඇත්තෙන්ම හිතළුවකි.
ඔහු තවදුරටත් විස්තර කරන ආකාරයට සිසේරියන් සැත්කමක් සිදු කිරීමේදී ගර්භාෂය කපා දරුවා සහ වැදෑමහ ඉවත් කර ගර්භාෂ නැවත මසා අවසන් වන තුරු පැලෝපීය නාල දෙස අවධානය යොමුකිරීමේ ඉඩක් නැත. කෙසේවුවද එබදු සංකීර්ණ හා රෝගී ජීවිතය සම්බන්ධයෙන් තීරනාත්මක සැත්කමක් දෙස සැම විටම ඇස් හයක් යොමුවන බව වෛද්‍ය පියල් පවසයි. එසේ සිසේරියන් සැත්කමකදී අවධානය වෙනස් නොකර තබාගන්නා පිරිස ලෙස, සැත්කම සිදුකරන ශල්‍ය වෛද්‍යවරයා, සහායක වෛද්‍යවරයා සහ සහායක හෙදිය සිටිනු ඇත. 

කෙසේවෙතත්, එවැනි අවස්ථාවක වඳ සැත්කමක් කිරිම සඳහා පැලෝපීය නාලය අවහිර කිරීම හෝ කොටසක් කපා ඉවත් කළයුතුය. සිසේරියන් වඳ සැත්කමකදී පැලෝපීය නාල කොටසක් ඉවත් කිරිමේ ක්‍රමය අනුගමනය කරයි. නමුත් එවැන්නක් ඉහත කී පිරිසගේ දැනුවත්භාවය යටතේ මිස රහසිගතව සිදුකළ නොහැකිය.

කෙසේවෙතත් මවකගේ ගර්භාෂය තවදුරටත් දරු ගැබක් සදහා සහ දරු ප්‍රසූතියක් සදහා සුදුසු නොවන බව පවසා වඳ සැත්කම් සිදුකරන්නට වෛද්‍යවරුන්ට හැකි නමුත් ඒ සදහා රෝගියා දැනුවත් කළ මෙන්ම ඉහත කී කාර්ය මණ්ඩලයේ අවබෝධය මත එකී සැත්කම කළ යුතුව ඇත. ඒ නිසා ප්‍රායෝගික වශයෙන් මෙම කටයුත්ත සහයක හෙදියන් සහ සහයක වෛද්‍යවරුන්ගේ සහාය නැතිව කළ නොහැකිය.

මෙම පුවතට අදාළව සත්‍ය අසත්‍යතාව අනාවරණය කිරීමද සරල විමර්ශන කාර්යයකි. එනම්, චෝදනා ලබා ඇති වෛද්‍යවරයා ඔහුගේ සේවා කාලය තුළ කරන ලද සැත්කම්වල රෝගීන් සහ ලේඛන සොයාගැනීමට රෝහල් පරිපාලනය හරහා සිදුකළ හැකිය. එම රෝගීන් ට සිසේරියන් සැත්කම් සමග වඳ සැත්කම කර ඇති බව සඳහන්කර නොමැති නම් ඒ ගැන පවතින සැකය මත විධිමත් පරීක්ෂාවක් සිදුකිරීම මගින් නාල අවහිරතා සිදුවී ඇති දැයි පරික්ෂා කර ගත හැක.

එසේම කිසියම් වෛද්‍යවරයෙක් විසින් තමන්ගේ සේවා කාලය තුළ එසේ කරනු අන්‍ය වෛද්‍යවරු හෝ හෙදියන් දැක හෝ අසා හෝ ඇති නම් ඒ බව දැනුම් දීමට හැකිය. එබදු සිදුවීම් රෝහල් අධ්‍යක්ෂකට හෝ අමාත්‍යාංශයට දැනුම් දීමට චක්‍රලේඛයක් නිකුත් කර ඇත. 

එපමණක් නොව, එවැනි සිදුවීමකට මුහුණ දෙන අයකුට ළඟම පොලීසියට පැමිණිල්ලක් කර ඒ පිළිබඳව විමර්ශන ආරම්භ කිරීමට බලපෑම් කළ හැකිය. 

කෙසේවෙතත්, මෙම වෛද්‍යවරයා සම්බන්ධව පළ කළ පුවත අසත්‍ය නම් එමගින් ජාතිවාදය ඇවිස්සීමට සහ රටේ ජනයා නොමඟ යැවීමට කටයුතු කර තිබීම හේතුවෙන් රටේ පවතින නීති මාර්ගයෙන් ක්‍රියාත්මක විය හැකිය. එවැනි ප්‍රෙකා්පකාරී පුවතක් පළ කිරීමේ වරද සනාථ වුවහොත් පුවත්පත තහනම් කිරීම ද කළ හැකි බව විද්වත් මතයයි. මෙවැනි පුවතක් සම්බන්ධයෙන් ක්‍රියාත්මක විය යුතු රටේ වගකිව යුතු නිල ආයතන ගණනාවකි. එහිදී රජයේ වෛද්‍ය නිලධාරි සංගමය, ශ්‍රී ලංකා වෛද්‍ය මණ්ඩලය, ශ්‍රී ලංකාවේ ප්‍රසව හා නාරි වෛද්‍යවරුන්ගේ විද්‍යාලය, සෞඛ්‍ය අමාත්‍යංශය ,පොලිසිය ප්‍රධාන වේ. ඊට අමතරව, මෙබදු විනාශකාරී ප්‍රචාරයක් ප්‍රසිද්ධ කිරීම සිදුකළ මාධ්‍ය හා මාධ්‍යවේදින් සමිබන්ධයෙන්ද ජනතාව සහ නෛතික ආයතන එක්ව කටයුතු කළ යුතුය.